Հայաստանի Հանրապետությունում տնային կալանքի տակ գտնվող 922 անձից 869-ն ունեն ընտրելու իրավունք։ Այս մասին Օբյեկտիվ.am-ը տեղեկացավ ՀՀ արդարադատության նախարարությունից։
Գերատեսչության տվյալներով՝ ժամը 12:30-ի դրությամբ ընտրությանը մասնակցելու ցանկություն է հայտնել 434 անձ, որոնցից արդեն քվեարկել է 205-ը։
Քվեարկության իրավունքի իրացման նպատակով ՀՀ արդարադատության նախարարության Պրոբացիայի ծառայությունը կազմակերպել և իրականացրել է տնային կալանքի տակ գտնվող անձանց ուղեկցումը համապատասխան ընտրատեղամասեր՝ օրենքով սահմանված կարգով։
Նախարարությունից նշում են, որ Պրոբացիայի ծառայությունը շարունակում է ապահովել ընտրելու իրավունք ունեցող՝ տնային կալանքի տակ գտնվող անձանց ընտրական իրավունքի անարգել իրականացումը՝ պահպանելով օրինականության, հավասարության և սահմանադրական իրավունքի պաշտպանության սկզբունքները։
Նշվում է նաև, որ ներկայացված տվյալները վերաբերում են ժամը 12:30-ի դրությանը և կարող են փոփոխվել քվեարկության ընթացքի ընթացքում։