Հունիսի 7-ին Հայաստանյայց Առաքելական Սուրբ Եկեղեցին նշել է Կաթողիկե Սուրբ Էջմիածնի տոնը։ Այս մասին հայտնում են Մայր Աթոռ Սուրբ Էջմիածնի տեղեկատվական համակարգից։
Տոնի առիթով Միածնաէջ Մայր Տաճարում, Ն․Ս․Օ․Տ․Տ․ Գարեգին Երկրորդ-ի հանդիսապետությամբ, մատուցվել է Սուրբ և Անմահ Պատարագ։
Պատարագիչն էր Մայր Աթոռ Սուրբ Էջմիածնի Քարոզչական կենտրոնի տնօրեն Գերաշնորհ Տ․ Զաքարիա եպիսկոպոս Բաղումյանը։ Արարողությանը մասնակցել են Հայ Եկեղեցու թեմակալ առաջնորդներ, Մայր Աթոռի միաբանությունը և բազմաթիվ ուխտավորներ։
Իր քարոզում Զաքարիա եպիսկոպոս Բաղումյանը անդրադարձել է Սուրբ Էջմիածնի խորհրդին՝ ընդգծելով նրա դերը որպես ազգային միասնության, հոգևոր ինքնության և պատմական շարունակականության խորհրդանիշ։
Նա նշել է, որ Սուրբ Էջմիածինը դարերի ընթացքում եղել է հայ ժողովրդի հոգևոր կենտրոնը՝ միավորելով հավատքն ու ազգային ինքնությունը, և դժվար պահերին դարձել համախմբման կարևոր հենարան։
Պատարագի ավարտին Մայր Տաճարի Սուրբ Իջման Խորանի առջև Ամենայն Հայոց Հայրապետի գլխավորությամբ կատարվել է Հայրապետական մաղթանք՝ աղոթք հղելով Մայր Աթոռի անսասանության և պայծառության համար։
Օբյեկտիվ.am-ը տեղեկանում է Մայր Աթոռ Սուրբ Էջմիածնից։