Ռուսաստանի նախագահ Վլադիմիր Պուտինը ստորագրել է օրենք, որը թույլ է տալիս կալանք դնել արտերկրում բնակվող Ռուսաստանի քաղաքացիների գույքի վրա, եթե նրանք մեղադրվում են Ռուսաստանի շահերի դեմ ուղղված վարչական իրավախախտումներ կատարելու մեջ։
Նոր օրենքով ընդլայնվում է այն վարչական իրավախախտումների ցանկը, որոնց համար պատասխանատվության կարող են ենթարկվել նաև Ռուսաստանի սահմաններից դուրս գտնվող քաղաքացիները։ Խոսքը վերաբերում է, մասնավորապես, ռուսական բանակի «վարկաբեկմանը», պետական մարմինների կամ պաշտոնատար անձանց վիրավորանքին, ինչպես նաև Ռուսաստանի դեմ պատժամիջոցներ կիրառելու հրապարակային կոչերին։
Փաստաթուղթը նախատեսում է, որ նման գործերով մեղավոր ճանաչված անձանց նկատմամբ կարող են կիրառվել գույքային սահմանափակումներ՝ ներառյալ բանկային հաշիվների և այլ ակտիվների կալանքը։ Միջոցները կարող են կիրառվել անկախ այն հանգամանքից, թե տվյալ անձը տվյալ պահին որ երկրում է գտնվում։
Օրենքը նախապես հավանության էր արժանացել Ռուսաստանի Պետական դումայի և Դաշնության խորհրդի կողմից, իսկ Պուտինի ստորագրությունից հետո այն ստացել է վերջնական իրավական ուժ։